Cwestiynau Cyffredin?

C - A roddir patshys i mi pan fyddaf yn dod i'r grŵp?

A - Ni allwn ddarparu na rhagnodi meddyginiaethau yn y sesiynau grŵp. Unwaith y byddwch wedi mynd i'r Sesiwn Asesu a'ch bod yn barod i roi'r gorau iddi, gall eich Cynghorydd roi llythyr i chi ei roi i'ch meddyg teulu neu'ch fferyllydd lleol fel bod modd i chi gael therapi amnewid nicotin. Fel arall gallwn roi llythyr i chi ei roi i'ch meddyg teulu i roi gwybod iddo fod gennych ddiddordeb mewn cael naill ai Zyban™ neu Champix™.

C - Pam bod yn rhaid i mi fynd bob wythnos?

A - Yn ogystal â rhoi gwybodaeth i chi am feddyginiaethau i'ch helpu i roi'r gorau i smygu bydd y rhaglen cymorth grŵp chwe wythnos yn eich helpu i ddysgu sut i reoli eich ysfa i smygu a newid eich arferion i sicrhau nad ydych yn ailddechrau smygu. Dengys ein gwaith ymchwil os mai dim ond i un o'r chwe sesiwn y byddwch yn mynd iddi bydd eich tebygolrwydd o roi'r gorau iddi yn llwyddiannus yn gostwng i 20%. Os byddwch yn mynd i bob un o'r chwe sesiwn bydd eich tebygolrwydd o roi'r gorau iddi yn codi i 85%.

C - Beth os nad wyf yn barod i roi'r gorau iddi?

A - Os ewch i'r Sesiwn Asesu a theimlo nad dyma'r amser iawn i geisio rhoi'r gorau iddi gallwch gysylltu â ni eto pan fyddwch yn barod. Awgrymwn y gall chwe mis fod yn gyfnod da i gael eich cymell unwaith eto a rhoi cynnig arall arni.

C - Dydw i ddim yn gwybod a fyddai grŵp o gymorth i mi. Alla i weld Cynghorydd ar sail un i un?

A - Os hoffech weld Cynghorydd ar sail un i un gellir trafod hyn. Ceisiwn drefnu cyfarfodydd un i un ar gyfer smygwyr beichiog, y rheini fydd yn cael llawdriniaeth, pobl ifanc a'r rheini nad yw sesiwn grŵp yn addas iddynt.

C - Rwy'n cymryd tabledi ar gyfer cyflwr iechyd - a fyddaf yn gallu defnyddio therapi amnewid nicotin o hyd?

A - Am na allwn weld eich cofnodion meddygol ni fyddwn yn gallu gwneud asesiad o unrhyw wrtharwyddion posibl gyda meddyginiaethau i'ch helpu i roi'r gorau i smygu. Byddwn yn eich cyfeirio at eich meddyg teulu i sicrhau nad oes unrhyw broblemau.