Rhaglen Cymorth Grŵp

Pan fyddwch yn gwneud apwyntiad i fynd i raglen cymorth grŵp Dim Smygu Cymru, byddwch yn ymuno â grŵp o smygwyr eraill sydd am roi'r gorau i smygu fel chi. Caiff pob grŵp ei arwain gan Gynghorydd hyfforddedig i'ch cefnogi a'ch annog dwy'r rhaglen.

 

Mae rhaglen cymorth grŵp Dim Smygu Cymru yn cynnwys sesiwn asesu, wedi'i dilyn gan chwe sesiwn cymorth ymddygiadol wythnosol. Dyma amlinelliad o'r hyn y gallwch ei ddisgwyl o bob sesiwn: 

Yn y sesiwn hon, fe'ch croesewir i'r grŵp a byddwch yn cadarnhau eich ymrwymiad i'r cwrs. Byddwch yn clywed am fanteision rhoi'r gorau iddi gyda Dim Smygu Cymru a phwysigrwydd cymorth ymddygiadol dwys. Rhoddir gwybodaeth i chi am therapi amnewid nicotin (e.e. patshys a gwm cnoi) a chymhorthion triniaeth eraill. Cyflwynir monitor carbon monocsid i chi a fydd yn monitro eich cynnydd ac yn eich cymell i beidio ag ailddechrau smygu.

Mae monitor carbon monocsid (CO) yn mesur y gyfran fach o CO sydd yn yr aer rydych yn ei anadlu allan. Mae CO yn nwy gwenwynig a gaiff ei anadlu i mewn pan fyddwch yn smygu. Dim ond 30 eiliad y mae'r prawf yn ei gymryd a gall ddangos pa mor gyflym y bydd CO yn gadael eich corff pan fyddwch yn rhoi'r gorau iddi. Dim ond 24 awr y mae'n ei gymryd!

Erbyn yr ail sesiwn byddwch wedi rhoi'r gorau i smygu. Yn ystod sesiwn dau i bump, bydd cyfle i drafod symptomau rhoi'r gorau iddi, ffyrdd o ymdopi â sefyllfaoedd anodd, cynnal cymhelliant i roi'r gorau i smygu, cymhorthion rhoi'r gorau i smygu a phrofion carbon monocsid.

Bydd sesiwn 6 yn canolbwyntio ar eich helpu i beidio ag ailddechrau smygu. Cewch gyfle i edrych yn ôl ar y cynnydd rydych wedi'i wneud dros y chwe wythnos a byddwch yn cael cyngor ar sut i'ch atal rhag ailddechrau smygu. Caiff lefelau carbon monocsid eu monitro.

Mae Dim Smygu Cymru yn cynnal sesiynau grŵp wythnosol ledled Cymru. I gael rhagor o wybodaeth am eich sesiwn grŵp Dim Smygu Cymru agosaf, ffoniwch ein llinell gymorth am ddim ar 0800 085 2219 a siaradwch ag aelod o'n tîm cyfeillgar.